The Banks O' Doon

Ye banks and braes o' bonnie Doon,
How can ye bloom sae fresh and fair?
How can ye chant, ye little birds,
And I sae weary, fu' o' care?

Thou'lt break my heart, thou warbling bird,
That wantons through the flowering thorn;
Thou minds me o' departed joys,
Departed—never to return.

Thou'lt break my heart, thou bonnie bird,
That sings beside thy mate;
For sae I sat, and sae I sang,
And wistna o' my fate.

Aft hae I roved by bonnie Doon,
To see the rose and woodbine twine;
And ilka bird sang o' its luve,
And, fondly, sae did I o' mine.

Wi' lightsome heart I pou'd a rose,
Fu' sweet upon its thorny tree;
And my fause luver stole my rose,
But ah! he left the thorn wi' me.